Urukingo rwa Ebola rwemejwe n’ikigo cy’ubugenzuzi bw’imiti

Urukingo rukiri mu igeragezwa kuri ubu ruri gukoreshwa mu kurinda ko Ebola ikomeza gukwirakwira, rwemejwe n’abagenzuzi b’inkingo b’i Burayi.

Urwo rukingo, rwakozwe na kompanyi Merck yo muri Leta Zunze Ubumwe z’Amerika ikora imiti, rwagaragajwe ko ari ingirakamaro mu kurinda abantu virusi ya Ebola.

Ishami ry’umuryango w’abibumye ryita ku buzima (OMS) rivuga ko inkingo za mbere zemewe zo muri ubwo bwoko zizatangira gukoreshwa hagati mu mwaka utaha wa 2020.

Abantu barenga 2,000 bamaze kwicwa na Ebola muri DR Congo naho abarenga 3,000 bamaze kuyandura muri icyo gihugu, mu cyorezo cya Ebola cyahadutse mu mwaka ushize.

Ikigo gishinzwe iby’imiti cy’i Burayi - European Medicines Agency - cyemeye ko urwo rukingo ruba rutangiye kugurishwa mu gihe hagitegerejwe ko rwuzuza ibindi bisabwa.

Ni rwo rukingo rwa mbere rubayeho ku isi rwa Ebola.

Biteganyijwe ko mu byumweru bicye biri imbere urwo rukingo ruzemererwa gucuruzwa mu buryo busesuye rumaze kuzuza ibyo bindi bisabwa.

Izi ni intambwe zikomeye zitewe mu kwerekeza ku rukingo ruramira ubuzima bw’abantu, atari gusa mu bihugu byari byararwemereye ko rukoreshwa mu buryo bw’ubushakashatsi.

Uku kwemerwa kwarwo ntabwo guhindura ukuntu ruri gukoreshwa mu guhangana na Ebola muri DR Congo, aho abantu barenga 230,000 bamaze gukingirwa.

Ariko bivuze ko ubu noneho isi iri hafi kubona umuti wemewe mu buryo busesuye wo kurinda ikwirakwira rya Ebola mu gihe kizaza.

BBC

IZINDI NKURU
Ibitekerezo(0)
Tanga Igitekerezo