Coronavirus: Ubu imaze kwica abarenga 500,000

Isi iracyugarijwe n’icyorezo cya coronavirus, Afurika iri mu migabane itazahaye cyane, imibare y’abanduye mu karere k’ibiyaga binini ikomeje kuzamuka buhoro buhoro. Kompanyi zikora imiti kw’isi nazo zikomeje gukora bidasanzwe zishaka umuti w’iyi ndwara cyangwa urukingo, gusa kugeza ubu abo imaze kwica ku isi barenze 500.000.

Ubwandu bw’icyorezo cya COVID-19 bukomeje gukwirakwira hirya no hino ku isi, aho abamaze kubarurwa ko banduye iki cyorezo barenze miliyoni 10 naho abo kimaze guhitana bakaba ari ibihumbi magana atanu.

Imibare yo kuri iki Cyumweru, tariki ya 28 Kamena 2020, yerekana ko abamaze guhitanwa na COVID-19 ku Isi yose barenga 501,437.

Amerika niyo ikomeje kuzahazwa n’iki cyorezo, abantu 125,203 imaze kubica nk’uko bivugwa na kaminuza ya Johns Hopkins.

Brazil ikurikiraho aho hamaze gupfa abantu 57,622, hagataho Ubwongereza, Ubutaliyani na Espagne.

Ubundi, hejuru ya kimwe cya kabiri cy’abantu bose bamaze kwicwa n’iki cyorezo ni abo muri ibyo bihugu bitanu.

Amashuri n’indege birasubukurwa mu bihugu bimwe na bimwe

Muri Tanzania uyu munsi kuwa mbere amashuri yari asigaye atarafungura arongera gutangira nk’uko Perezida John Magufuli aheruka kubitegeka.

Leta ya Tazania yemeza ko coronavirus yarangiye muri iki gihugu, hashize hafi amezi abiri idatangaza uko iki cyorezo gihagaze mu gihugu.

Muri Guinea naho uyu munsi abanyeshuri barasubira ku mashuri nyuma yo koroshya ingamba zari zarafashwe, gusa bategetswe kujya biga bambaye udupfukamunwa.

Muri Liberia ikibuga cy’indege uyu munsi kirafungurwa, nubwo hakiriho ingamba zimwe zo kwirinda kugeza tariki 22 z’ukwezi gutaha kwa karindwi.

Abantu 400,000 muri ’lockdown’ mu Bushinwa

Ubushinwa bwasubijeho amategeko yo kugumisha abantu mu ngo hafi ya Beijing, abantu barenga 400,000 bagomba kuguma mu rugo nyuma y’ubwiyongere bworoheje bw’iki cyorezo.

Aya mategeko yashyizweho mu ntara za Anxin na Hebei, abakozi bakora ibyangombwa cyane nibo bemerewe kuva mu rugo, umuntu umwe mu rugo nawe yemerewe gusohoka rimwe ku munsi akajya guhaha.

Nyuma y’uko iki cyorezo kibonetse bwa mbere mu Bushinwa mu mpera z’umwaka ushize, iki gihugu kigaragaza ko cyabashije kugabanya ubwiyongere bwacyo.

Mu kurwanya indi nkubiri nshya ya Covid-19, leta y’Ubushinwa ubu ishyiraho amategeko akomeye ahagaragaye ubwandu bushya, nubwo bwaba ari bucye.

BBC

IZINDI NKURU
Ibitekerezo(0)
Tanga Igitekerezo