Covid-19: Nyuma y’u Rwanda,muri Malawi naho bafunze amashuri

Kuva kuri uyu wa mbere amashuri yose muri Malawi arafunga, biri mu ngamba nshya zafashwe mu kurwanya ikwirakwira rya coronavirus.

Mu Rwanda, naho kuva uyu munsi amashuri y’incuke, abanza n’ayisumbuye mu mujyi wa Kigali arafungwa kubera ubwandu bukomeje kwiyongera.

Muri Africa abantu bamaze kwandura Covid-19 bararenga miliyoni 3.2 naho abo imaze kwica bararenga 78,000, nk’uko bivugwa n’ikigo gishinzwe ibyorezo cy’ubumwe bwa Africa.

Mu ijambo yavugiye kuri televiziyo, perezida Lazarus Chakwera wa Malawi yanatangaje umukwabu wa nijoro uzajya utangira saa tatu ku isaha yaho.

Yatangaje kandi ko abantu barenze 50 batemerewe guhurira ahantu hamwe.

BBC dukesha iyi nkuru itangaza ko Muri Malawi bakiri mu cyunamo nyuma y’uko Covid-19 yishe abaminisitiri babiri bo muri guverinoma.

Kimwe cya gatatu cy’abantu 300 bishwe na coronavirus muri Malawi yabishe muri uku kwezi gusa.

Rwanda - hitezwe ingamba zikomeye kurushaho

Valentine Uwamariya, minisitiri w’uburezi mu Rwanda yavuze ko amashuri n’ahandi mu gihugu ashobora gufungwa, igihe naho ubwandu bwakwiyongera.

Amashuri yari aherutse gufungura mu kwezi kwa 11 nyuma y’amezi umunani afunze kubera iki cyorezo.

Muri uku kwezi gusa Covid-19 imaze kwica abantu 50 mu Rwanda ku bantu 142 imaze kwica kuva yahagera mu kwezi kwa gatatu umwaka ushize.

Mu minsi irindwi ishize, mu Rwanda hatangajwe abantu bashya barenga 1,000 banduye.

Byitezwe cyane ko leta ishobora gutangaza ingamba nshya zikaze kurushaho mu kwirinda iki cyorezo.

Mu gihugu hasanzweho umukwabu utangira saa mbiri z’ijoro, ingendo hagati y’uturere, n’uturere n’umujyi wa Kigali nazo zirabujijwe.

Kuri ubu mu Rwanda , ibitaro byose bya leta byatangiye kuvura abanduye Covid-19 bivuriza ku bwisungane mu kwivuza .

IZINDI NKURU
Ibitekerezo(0)
Tanga Igitekerezo