Covid-19:Brazil hamaze gupfa abarenga 100.00

Brazil imaze kugira abantu barenga 100.000 bishwe na Covid-19, igihugu cya kabiri gifite benshi bapfuye ku isi, mu gihe kandi iki cyorezo muri iki gihugu kitagaragaza gucogora.

Iyi virusi yishe abantu 50.000 mu mezi atatu ya mbere, ariko uyu mubare wikubye kabiri mu minsi 50 gusa. Bamaze kugira abantu barenga miliyoni eshatu banduye iyi ndwara.

Abahanga mu buvuzi bavuga ko iki cyorezo muri Brazil kitaragera ku gasongero mbere yo gucururuka, ariko ubu bamaze gufungura amaguriro n’inzu z’uburiro.

Perezida Jair Bolsonaro yabanje gufata nk’icyoroshye iyi virus ndetse arwanya ingamba zo kukirwanya avuga ko zizambya ubukungu.

Nyuma nawe yaje gufatwa n’iki cyorezo ariko arakira, yakomeje kurwanya zimwe mu ngamba zafashwe n’abayobora intara, ndetse kenshi yagaragaye mu bantu benshi atambaye agapfukamunwa.

Abahanga bavuga ko kutagira uburyo bwumvikanyweho hagati ya leta iyobowe na Bolsonaro n’abandi bategetsi biri mu byatumye iyi virus izahaza Brazil.

Brazil iri kwitwara ite muri ibi bihe ?

Minisiteri y’ubuzima iyobowe n’umusirikare w’umujenerali udafite ubunararibonye mu by’amagara y’abantu.

Ba minisitiri babiri, bari abaganga, bombi bareguye kubera kutumvikana na perezida ku mabwiriza asaba abantu kutegerana no gukoresha hydroxychloroquine, ubushakashatsi bwerekanye ko utavura kandi ufite ingaruka mbi.

Perezida Bolsonaro - wise Covid-19 "uducurane tworoheje" kandi wanenzwe mu gihugu no mu mahanga uko yitwaye- avuga ko yakize iyi virus kubera uriya muti ubusanzwe uvura malaria.

Dr José Davi Urbaez wo mu intsinda ryitwa Infectious Diseases Society yabwiye ibiro ntaramakuru Reuters ati: "Dukwiye kuba turi mu bihe by’amakuba, kuko iki cyorezo ari akaga nk’intambara y’isi. Ariko Brazil yose yibereye mu kinya".

Uyu muganga anenga umuhate mucye wa leta mu kurwanya iki cyorezo.

Brazil ubu imaze kugira abantu 100,477 bapfuye kubera coronavirus na 3,035,582 bayanduye nk’uko bivugwa na minisiteri y’ubuzima yahoo.

Iyi mibare bikekwako iri hejuru kurushaho kubera gupima biri hasi. Leta zunze ubumwe za Amerika nizo gusa zifite imibare irenze iyi.

Umutegetsi utarategetse

Mu gihe byari bitangajwe ko abapfuye muri Brazil barenze 100,000 humvikanye abantu bishimye ndetse baturitsa ibishashi by’umuriro wo mu byishimo mu mujyi wa São Paulo. Ntabwo bishimiraga ko Covid-19 iri kugarika ingogo - ahubwo ko ikipe ya Palmeiras yari itwaye igikombe cya shampiyona mukeba wayo Corinthians kuri za penaliti.

Urukundo rutangaje rwa ruhago ntabwo barushyize hasi - cyane cyane ubu hari n’ikiri kubabuza ibyishimo - ariko kuba Jair Bolsonaro yarashimiye abegukanye igikombe nyamara ntagire icyo avuga kuri iyo mibare y’abari gupfa, bisobanuye byinshi ku buryo abona iki cyorezo.

Inkuru nyamukuru z’ibinyamakuru z’ejo ku cyumweru zanengaga uyu mutegetsi.

Kunanirwa gutegeka bikomeje gutera benshi amakenga cyane cyane kuba igihugu kimaze gufungura ibikorwa mu gihe iyi virus ikomeje guca ibintu.

Ahandi muri America y’Epfo byifashe bite ?

Brazil yonyine, yihariye hafi kimwe cya kabiri cy’impfu zose za coronavirus muri America y’Epfo na Karayibe, aho abantu barenga miliyoni eshanu bamaze kuyandura nk’uko bivugwa na kaminuza ya Johns Hopkins ikurikirana iki cyorezo ku isi.

Ibindi bihugu kuri uwo mugabane byakubititse birimo Mexico - ubu ni iya gatatu ku isi mu bihugu byapfushije benshi, 52,000 mu bantu 476,000 bayanduye - Peru, Colombia na Chile nabyo ntibyorohewe.

Inzobere zivuga ko uruvange rw’imijyi ituwe mu bucucike bukabije, ubukene, ubutegetsi n’ubuvuzi buciriritse biri gutuma iki cyorezo cyimonogoza muri ako gace.

BBC

IZINDI NKURU
Ibitekerezo(0)
Tanga Igitekerezo