Impinduka mu mihango no kuva bititezwe nyuma yo gukingirwa Covid bikwiye gukorwaho iperereza mu kumara impungenge abagore, nk’uko bisabwa n’inzobere mu nkingo iri no kunononsora iby’ubugumba.
Dr Victoria Male wo muri Imperial College London yanditse muri BMJ ko ubwirinzi bw’umubiri bushobora kuba ari yo mpamvu, aho kuba ikintu kiri mu nkingo, ariko ko nta bushakashatsi bwagutse burabyemeza.
Kugeza ubu nta kirerekana ko hari ingaruka z’izi nkingo ku mugore utwite cyangwa ku gusama.
Mu Bwongereza hamaze kwakirwa ibibazo by’abagore barenga 30,000 bavuga ko bagize ibibazo mu mihango nyuma yo gukingirwa.
Ibyo birimo imihango myinshi kurusha isanzwe, gutinda kw’imihango cyangwa kuva bititezwe nyuma yo gukingirwa byuzuye, mu nkingo zirenga miliyoni 47 zimaze guterwa abagore kugeza ubu mu Bwongereza.
Raporo y’ikigo Medicines and Healthcare products Regulatory Agency (MHRA) ivuga ko "nta huriro" riri hagati y’inkingo za Covid n’ibyo bimenyetso.
Ibibazo mu mihango ni ibintu bibaho kenshi, bishobora guterwa n’impamvu zitandukanye, kandi umubare w’abavuga ibibazo bagize nyuma yo gukingirwa uracyari muto.
Impinduka mu mihango zavuzwe kandi no ku bagore banduye iyi virus cyangwa abayirwaye.
Gusa, Dr Male avuga ko hakwiye gukorwa ubushakashatsi bwagutse ku bibazo mu mihango bugasubiza amakuru ayobya bamwe bavuga ku nkingo.
Agira ati: "Gushidikanya inkingo mu bakobwa bakiri bato kenshi biterwa n’amakuru ayobya avuga ko inkingo za Covid-19 zishobora kubabuza kuzasama.
"Kudacukumbura byimbitse amakuru ku mpinduka mu mihango nyuma yo gukingirwa bishobora kongera ubwo bwoba.
"Niba hemejwe ihuriro hagati y’imihango no gukingirwa, ayo makuru yafasha abantu kwitegura impinduka mu mihango yabo."
Dr Male, umwalimu mu byo gukingira n’uburumbuke, avuga ko "amakuru nyayo kandi yizewe" akenewe cyane ku bagore bagomba kubaho bazi neza gahunda y’imihango yabo.
’Kwirinda bya nyabyo’
Abahanga muri siyansi kugeza ubu ntibaramenya neza uko inkingo zishobora gutera impinduka mu mihango.
Ibyo bishobora guterwa n’impinduka ziba zabayeho mu bwirinzi bw’umubiri - biterwa n’inkingo - ku misemburo ituma habaho imihango ya buri kwezi, ariko zishobora no guterwa n’uturemangingo tw’ubwirinzi tuba twagezweho n’urukingo muri nyababyeyi.
Izindi nkingo, nk’urukingo rwa cancer y’inkondo y’umura (HPV), nazo zahujwe n’impinduka nk’izi mu mihango - ariko hakozwe ubushakashatsi buto ku mpamvu n’uko bibaho.
Abahanga muri siyansi bemeza ko ubushobozi bwo kubyara bw’umugore budakorwaho n’inkingo. Amagerageza yakozwe yerekanye ko gukingirwa bidakuraho gusama, yerekanye kandi ko nyuma yo gukingirwa intanga z’umugabo nta kibazo zigira.
Dr Jo Mountfield, wo muri Royal College of Obstetricians and Gynaecologists (RCOG), avuga ko impinduka mu mihango zishobora kuba ikibazo cyo kwitaho, ariko akenshi ziba ukwezi kumwe cyangwa abiri.
Madamu Mountfield asaba buri wese wagize kuva gukabije, cyane cyane mu bagore bacuze imbyaro, kugana muganga bakaganira, ariko ashimangira ko nta ngaruka mbi z’igihe kirekire zibirimo.
Ati: "Nta kimenyetso cyerekana ko izi mpinduka z’igihe gito zigira ingaruka ku burumbuke bw’umuntu, cyangwa ubushobozi bwo kubyara."
RCOG ivuga ko kwikingiza ari bwo "buryo nyabwo" bwo kwirinda coronavirus, cyane cyane uteganya gusama, kuko abagore batwite batakingiwe baba bafite ibyago byo kuremba igihe banduye Covid kurusha abandi bo mu myaka yabo.
Nayo isaba ko habaho ubushakashatsi bwimbitse ku mpamvu ki hari abagore bagira impinduka mu mihango nyuma yo gukingirwa.
BBC
