PHOTO+VIDEO: Young Grace witegura kwibaruka yakorewe ibirori bya ’ Baby Shower’

Umuhanzi Abayizera Grace uzwi cyane ku izina rya Young Grace witegura kwibaruka yamaze gukorerwa ibirori bya ’ Baby Shower’ na bagenzi be hamwe n’ababyeyi b’inshuti z’umuryango.

Baby shower ni ibirori bikorerwa umugore ugiye kubyara bigamije guha ikaze umwana ugiye kuza ku isi cyangwa umukobwa ugiye kubyara bwa mbere mu cyiciro cy’ababyeyi.

Ni ibirori byitabirwa n’ab’igitsina gore, baba bitwaje impano zitandukanye zirimo imyenda y’umwana, ibikinisho, ibikoresho by’isuku nka pampex/pampers, amasabune, amavuta, amabase yo kumwuhagiriramo, imitako yo mu cyumba cye n’ibindi.

Ibi birori byakorewe Young Grace byabereye i Nyamirambo kuri uyu wa gatandatu tariki 15 Kamena 2019. Nyina wa Young Grace ni umwe mu bari baje muri ibi birori by’umukobwa we adahemwe kugaragaza ko amushyigikiye cyane muri muzika ndetse no mu buzima busanzwe. Mu nshuti ze za hafi zari muri ibi birori, harimo Uwamwezi Nadege, uzwi nka Nana muri Filime ya City Maid.

Muri ibi birori, inshuti ze zamuhaye impano zitandukanye abakuze bamuha inama za kibyeyi dore ko uwo azabyara azaba ariyo mfura ye.

Aganira na Rwandamagazine.com, Young Grace yatangaje ko yanejejwe n’ibi birori. Ati " Nabyakiriye neza cyane. Narishimye, nishimiye inshuti zanjye n’umuryango wanjye ko banteguriye ibirori ndetse ko barikumwe nanjye mukwitegura imfura yanjye."

Young Grace yatangaje ko atwite ku wa 8 Werurwe 2019, abinyujije kuri Instagram ahishura ko ari kwitegura kwibaruka umwana we w’imfura. Ni umwana yamaze kubonera izina kuko azamwita Diamante.

Young Grace asanzwe akundana n’umusore witwa Rwabuhihi Hubert bakunda kwita Piqué ukina mu ikipe y’umupira w’amaguru yitwa Heroes yo mu Cyiciro cya Kabiri ndetse ni nawe se w’umwana atwite.

Mu minsi ishize aheruka gutangaza ko ko n’ubwo yatwise atabiteguye bidakuyeho urukundo rwa kibyeyi agomba umwana we. Yabitangaje yifashishije urukuta rwe rwa Instagram mu magambo yari ku ifoto iriho umubyeyi uteruye umwana, yisanisha nawe agira ati " Kuba bitari byateguwe… ntabwo bivuze kuba atarashakwaga cyangwa adakunzwe. Ni ikimenyetso cy’uko ubuzima bumenya icyo nari nkeneye mbere y’uko ngikora."

Tariki 19 Nzeri 2018 mu birori uyu muhanzikazi yizihirijemo isabukuru y’imyaka 25 y’amavuko, Rwabuhihi Hubert yambitse impeta y’urukundo Young Grace bemeranya kuzabana.

Umwana yamaze kumwita Diamante

Inshuti ze za hafi zari muri ibi birori

Uwamwezi Nadege uzwi nka Nana muri City Maid ni umwe mu nshuti ze za hafi

Ababyeyi b’inshuti z’umuryango bari hamwe na nyina wa Young Grace bari baje kumuha inama za kibyeyi

Nyina wa Young Grace ukunda kugaragaza ko ashyigikira cyane umukobwa we muri byose

PHOTO +VIDEO: King Phylosophe

IZINDI NKURU
Ibitekerezo(0)
Tanga Igitekerezo