Volleyball: REG yatsinze UTB ifata umwanya wa kabiri ku rutonde rwa shampiyona

REG VC yamaze kugera ku mwanya wa kabiri wa shampiyona y’igihugu ya Volleyball y’ikiciro cya mbere mu bagabo, ni nyuma y’uko yitwaye neza itsinda UTB VC bigoranye amaseti 3 kuri 2.

Uyu mukino wari uwo w’umunsi wa kabiri wa shampiyona, wari utegerejwe n’abakunzi batari bake b’umukino wa Volleyball, wabereye muri Petit Stade i Remera ku Cyumweru tariki 24 Ugushyingo 2019.

Ikipe ya REG VC yatangiye neza itsinda iseti ya mbere ku manota 25-22, gusa ibintu byaje kuyikomerera itsindwa iseti ya kabiri (25-15) ndetse n’iya 3 (25-21).

Iyi kipe ifite igikombe cya shampiyona y’umwaka ushize w’imikino wa 2018-2019, yaje kugaruka mu mukino itsinda iseti ya 4 ku manota 25-22 ndetse n’iya kamarampaka ku manota 17-15.

REG VC ikaba yahise yigaranzuraga UTB VC yari yayitsinze mu mukino wa nyuma w’irushanwa ribanziriza shampiyona amaseti 3 kuri 2 (26-24, 29-31, 25-20, 20-25 na 15-09).

Mu yindi mikino yabaye kuri uyu munsi wa kabiri, Gisagara VC yatsinze IPRC Ngoma VC amaseti 3-0 (25-16, 25-21 na 25-18) naho APR VC itsinda Kirehe VC amaseti 3 kuri 1 (25-20, 18-25, 25-18 na 25-17).

Nyuma y’iyi mikino y’umunsi wa kabiri, Gisagara VC irayoboye n’amanota 6, ikurikirwa na REG VC n’amanota 5, UTB VC ku mwanya wa 3 na APR VC (4) zinganya amanota 3, IPRC Ngoma VC ni ya 5 n’inota 1 naho Kirehe VC ni ya nyuma (6) nta nota ifite.

Mu mukino wa kabiri wa shampiyona REG VC yatsinzemo UTB VC amaseti 3-2

Nyirimana Fidele, umutoza mukuru wa UTB VC

Mugisha Bavuga Benon, umuyoza mukuru w’ikipe ya REG VC

Umuyobozi w’ishyirahamwe ry’umukino wa Volleyball mu Rwanda (FRVB), Karekezi Leandre nawe yakurikiranye umukino wa REG VC na UTB VC

Uyu mukino wa REG VC na UTB VC wari witabiriwe n’abantu batari bake

Uko amakipe yatsindanye ku munsi wa kabiri wa shampiyona

Uko amakipe akurikirana ku rutonde nyuma y’umunsi wa kabiri wa shampiyona

IZINDI NKURU
Ibitekerezo(1)
  • ######

    APR Yatsinze

    - 26/11/2019 - 16:01
Tanga Igitekerezo