Shampiyona y’igihugu y’umukino wa Volleyball y’ikiciro cya mbere mu bagabo y’umwaka w’imikino wa 2019-2020, iratangira kuri uyu wa Gatandatu tariki 09 Ugushyingo 2019.
Mu mikino 3 iteganyijwe, irimo aho ikipe ya REG VC ifite igikombe cya shampiyona y’umwaka ushize w’imikino wa 2018-2019, iratangira ihura n’ikipe ya APR VC ubere kuri Sitade Nto Amahoro i Remera (15h00).
Aganira na Rwanda Magazine, Mugisha Bavuga Benon umutoza mukuru wa REG VC yatangaje ko biteguye neza kubera ko bazi neza ko ikipe ya APR VC ari ikipe itaza kuborohera muri uyu mukino.
Ati “Twiteguye neza. APR VC ni ikipe ikomeye, rero tugomba gushyiramo imbaraga zacu zose 100% muri uyu mukino.”
Avuga yagerageje gukoresha neza umwanya yabonye mu irushanwa ribanziriza shampiyona “Pre-Season”, kugira ngo arebe urwego rw’abakinnyi bityo akaba yizera ko bagiye gutangira bahagaze neza.
Ati “Mu irushanwa ribanziriza shampiyona abakinnyi bose babonye umwanya wo gukina ndetse baranabyishimiye kurikina, bose bakinnye neza ndetse turimo gukora kugira ngo tuzamure urwego mu bice bitandukanye, rero abakinnyi ndizera ko bari mu mwuka mwiza wo gukina umukino mwiza.”
Mugisha Bavuga Benon utoza REG VC utangaza ko biteguye kwitwara neza imbere ya APR VC
REG VC iheruka kwegukana umwanya wa kabiri mu irushanwa ribanziriza shampiyona nyuma yo gutsindirwa ku mukino wa nyuma na UTB VC amaseti 3 kuri 2 (26-24, 29-31, 25-20, 20-25 na 15-09).
Iri rushanwa ryateguwe n’ikipe ya Gisagara VC “Gisagara Preseason Tournament 2019”, ryabaye tariki 02 na 03 Ugushyingo 2019.
Mu yindi mikino iteganyijwe kuri uyu munsi wa mbere wa shampiyona, ikipe ya Kirehe VC irakira Gisagara VC mu Karere ka Kirehe (11h00) naho ikipe ya IPRC Ngoma VC yakire ikipe ya UTB VC, ubere i Ngoma (11h00).
Mu mwaka w’imikino ushize wa shampiyona (2018-2019), REG VC yegukanye, ikurikirwa na Gisagara VC, UTB VC ku mwanya wa 3 aho ku mwanya wa 4 haza IPRC Ngoma VC.
UKO IMIKINO ITEYE UYU MUNSI
REG VC-APR VC (Amahoro-15h00)
Kirehe VC-Gisagara VC (Kirehe-11h00)
IPRC-Ngoma-UTB VC (Ngoma-11h00)
REG VC ifite igikombe cya shampiyona iheruka (2018-2019), irahura na APR VC ku munsi wa mbere
APR VC ni imwe mu makipe akunze kugora ikipe ya REG VC baza guhura
IPRC Ngoma VC yabaye iya kane mu mwaka ushize irakira UTB VC yabaye iya 3
Gisagara VC yabaye iya kabiri mu mwaka ushize irasura Kirehe VC
UTB VC iheruka kwitwara neza yegukana igikombe k’irushanwa ribanziriza shampiyona irasura IPRC Ngoma VC
Gahunda y’imikino y’uyu munsi
