Umuhungu wa Emeran Nkusi wakiniye Amavubi yongereye amasezerano muri Manchester United

Noam Emeran, umuhungu Fritz Nkusi Emeran wakiniye Amavubi, yongereye amasezerano muri Manchester United aho azageza mu 2024 ayikinira.

Kuri uyu wa Gatatu ni bwo Manchester United yatangaje ko uyu Noam Emeran w’imyaka 19 yasinye amasezerano mashya y’imyaka ibiri, ashobora kwiyongeraho undi umwe.

Ni umwe mu bakinnyi bamaze iminsi bitwara neza mu Ikipe y’Abatarengeje imyaka 23 ndetse aheruka kuyitsindira ubwo yanganyaga na Arsenal kuri Old Trafford mu kwezi gushize.

Noam Emeran yageze muri Manchester United muri Gashyantare 2019, nyuma y’uko yifuzwaga n’andi makipe akomeye ku mugabane w’u Burayi nka Paris Saint-Germain yo mu Bufaransa, FC Barcelone yo muri Espagne na Juventus yo mu Butaliyani.

Mu Ugushyingo uwo mwaka ni bwo yasinye amasezerano ya mbere nk’uwabigize umwuga nyuma yo kuzuza imyaka 17.

Uyu musore ukiri muto yavukiye i Paray le Monial mu Bufaransa mu 2002, kuri Fritz Emeran wakiniye Ikipe y’Igihugu Amavubi ndetse na mama we w’Umunyarwandakazi.

Yatangiriye ruhago mu ikipe y’abato ya FC Brussels mu Bubiligi, mbere y’uko yerekeza muri L’Entente Sannois Saint-Gratie iri mu cyiciro cya gatatu mu Bufaransa, ahava ajya muri Amiens yari mu Cyiciro cya Mbere.

Nubwo uyu mukinnyi yari atarakinira ikipe ya mbere ya Amiens, ntibyabujije amakipe arimo Manchester United kumutera imboni, aho bamwe bamugereranya nka Gaël Kakuta, Anthony Martial cyangwa Neymar.

IZINDI NKURU
Ibitekerezo(0)
Tanga Igitekerezo