Ishyirahamwe ry’umupira w’amaguru mu Rwanda, FERWAFA ryamaze gushyiraho itariki igikombe cya Super Cup kizakinirwaho. Nacyo kizabera ku Stade Umuganda i Rubavu, umukino uhuze APR FC na Mukura VS.
Ni umukino uteganyijwe tariki 6 Ukwakira 2018 guhera saa cyenda z’amanywa. APR FC yegukanye Shampiyona , Azam Rwanda Premier League 2017/18 izahura na Mukura VS yegukanye igikombe cy’Amahoro.
APR FC yatwaye igikombe n’amanota 66. Yatsinze imikino 19, inganga 9 itsindwa 2. Yatsinze ibitego 51 , itsindwa 15 mu mikino 30.
Mukura VS yo yegukanye igikombe cy’Amahoro 2018 itsinze Rayon Sports Penaliti 3-1.
Nibwo bwa mbere aya makipe yahurira ku mukino wa Super Cup kuva ritangiye gukinwa mu myaka 2 ishize gitangijwe na Azam TV.
Super Cup y’uyu mwaka izabanziriza Shampiyona y’u Rwanda iteganyijwe gutangira tariki 19 Ukwakira 2018.
Umwaka ushize Rayon Sports niyo yari yatwaye Super Cup itsinze APR FC 2-0. Ni umukino wabereye kuri Stade Umuganda tariki 23 Nzeri 2017 ariko ntiwarangira kubera ibura ry’umuriro ryatumye iminota 27 yari isigaye ngo umukino urangire ikinirwa kuri Stade ya Kigali i Nyamirambo tariki 27 Nzeri 2017..
APR FC izahagarira u Rwanda muri Total CAF Champions League naho Mukura VS izahagararire u Rwanda muri Total CAF Confederation Cup.
