REG VC yamaze gufata umwanya wa mbere ku rutonde rwa shampiyona ya Volleyball by’agateganyo, ni nyuma y’uko yitwaye itsinda IPRC Ngoma VC ku maseti 3-0, wabaye ku wa Gatandatu tariki 30 Ugushyingo 2019.
Muri uyu mukino wo ku munsi wa 3 wa shampiyona, REG VC yari yasuyemo IPRC Ngoma VC, yatsinze iseti ya mbere ku manota 25-21, itsinda iya 2 ku manota 28-26 ndetse n’iya 3 ku manota 25-21.
REG VC ifite igikombe cya shampiyona iheruka ya 2018-2019, iyi ni insinzi ya 3 nyuma y’uko yari yatsinze imikino ibiri, ari yo ku munsi wa mbere ndetse n’umunsi wa 2.
Iyi mikino irimo uwo yatsinzemo APR VC biyoroheye ku maseti 3-0 (26-24, 25-20 na 25-21) ndetse n’uwo yatsinzemo UTB VC bigoranye amaseti 3 kuri 2, wabereye muri Petit Stade i Remera ku Cyumweru tariki 24 Ugushyingo 2019.
Mu yindi mikino yo ku munsi wa 3 yabaye, APR VC yatunguranye itsinda Gisagara VC amaseti 3-1 (19-25, 25-23, 25- 20 na 25-15) ndetse Kirehe VC yatsinzwe na UTB VC amaseti 3 kuri 1 (21-25, 25-19, 20-25 na 20-25).
Nyuma y’iyi mikino y’umunsi wa gatatu, REG VC irayoboye n’amanota 8, ikurikirwa na Gisagara VC, UTB VC na APR VC zose zinganya amanota 6, IPRC Ngoma VC ni ya 5 n’inota 1 naho Kirehe VC ni ya nyuma (6) nta nota ifite.
Uyu mukino REG VC yatsinzemo IPRC Ngoma VC wayihesheje gufata umwanya wa mbere ku rutonde
Ikipe ya IPRC Ngoma VC iri ku mwanya wa 5 n’inota 1
