Perezida wa CAF yafungiwe mu Bufaransa

Ahmad Ahmad uyobora Impuzamashyirahamwe y’umupira w’amaguru muri Afurika, CAF yafatiwe mu Bufaransa arafungwa aho yari ari mu Hotel i Paris. Akurikiranyweho ibyaha bya ruswa.

Jeune Afrique dukesha iyi nkuru itangaza ko ahagana saa mbiri n’igice(8h30) z’igitondo cyo kuri uyu wa Kane tariki 6 Kamena 2019 aribwo yafatiwe muri Hotel yitwa Berri i Paris mu Bufaransa . Yagiye guhatwa ibibazo n’abashinzwe kurwanya ibyaha bya ruswa ndetse no kunyereza imitungo n’ imisoro (les services de l’Office central de lutte contre la corruption et les infractions financières et fiscales ,Oclif).

Jeune Afrique itangaza ko Ahmad yaba yaratanze isoko mu buryo bunyuranyije n’amategeko. Ni isoko ryaba ngo ryarambuwe kompanyi ya Puma mu buryo bunyuranyije n’amategeko hatubahirijwe amasezerano rigahabwa indi kompanyi yitwa Technical Steel.

Jeune Afrique ivuga ko agera ku bihumbi Magana inani mirongo itatu by’amadorali ya Amerika (830.000 $), asaga gato miliyoni 750 FRW ariyo ngo yongereweho ngo hatangwe iryo soko ari nayo afatwa nka ruswa.

Ahmad afunzwe yari i Paris aho yari yitabiriye inteko rusange ya FIFA ya 69 ari nayo yatorewemo Infantino ko akomeza kuyobora FIFA kugeza muri 2023.

Ifatwa rya Ahmad kandi rikurikinye n’icyemezo ubuyobozi bwa CAF bwafashe ku mugoroba wo kuri uyu wa Gatatu tariki 5 Kamena 2019 cyo gusubiramo umukino wa nyuma wa CAF Champions League wahuje Esperance yo muri Tunisia na Wydad yo muri Maroc. Ni umukino utararangiye kubera kwikura mu kibuga kwa Wyadad yavugaga ko yibwe igitego, nyuma igikombe kigahabwa Esperance ariko ubuyobozi bwa CAF bukaba bwarakoze inama y’igitaraganya yemeza ko uwo mukino ugomba gusubirwamo bityo ko na Esperance ikwiriye kugarura imidali n’igikombe yari yahawe.

Ishyirahamwe y’umupira w’amaguru ku isi,FIFA, naryo ryemeje ko Perezida w’impuzamashyirahamwe y’umupira w’amaguru muri Africa Ahmad Ahmad ’ari kubazwa’ n’abategetsi mu Bufaransa.

Itangazo rya FIFA rivuga ko ari kubazwa ’ibyo ashinjwa bigendanye n’imirimo ye nk’umuyobozi wa CAF’.

Itangazo rya FIFA rivuga ko ’itazi amakuru arambuye kuri iryo perereza bityo itari mu mwanya mwiza wo kubivugaho’.

Rivuga kandi ko bari gusaba ibisobanuro abategetsi mu Bufaransa kuri iryo perereza.

Perezida wa CAF yafatiwe mu Bufaransa mu gihe hasigaye iminsi 15 hagatangira irushanwa ry’igikombe cya Afurika cy’ibihugu.

IZINDI NKURU
Ibitekerezo(1)
Tanga Igitekerezo