Nshuti wari umunyezamu wa Rutsiro FC yitabye Imana azize impanuka

Uwari umunyezamu wa Rutsiro FC, Nshuti Yves, yitabye Imana kuri uyu wa Gatandatu, tariki ya 16 Mata 2022, aguye mu mpanuka ya moto.

Nshuti wari utwaye moto, yakoze impanuka ubwo yari ageze ahitwa ku Muhato agana mu Murenge wa Gisenyi, akubita umutwe hasi nk’uko amakuru abivuga.

Ikipe ya Rutsiro FC yakiniraga kuva ikiri mu Cyiciro cya Kabiri, yatangaje ko ibabajwe n’urupfu rw’uyu wari umunyezamu wayo nk’uko yabishyize mu butumwa bwo kuri Twitter.

Umuryango wa Nshuti Yves watangaje ko azashyingurwa ku Cyumweru, tariki ya 17 Mata, aho hazabanza igikorwa cyo gukura umurambo mu Bitaro bya Gisenyi saa Mbiri.

Saa Tanu hazaba isengesho rihumuriza umuryango mu rugo i Rubavu (Rukoko) mu gihe gushyingura bizaba saa Sita mu irimbi rya Rubavu riri mu Karundo.

IZINDI NKURU
Ibitekerezo(0)
Tanga Igitekerezo