Musanze FC imaze kurekura abakinnyi batatu

Ubuyobozi bwa Musanze FC bwafashe icyemezo cyo gutandukana n’abakinnyi batatu barimo Niyonsenga Ibrahim ‘Kibonge’ usoje amasezerano.

Nyuma yo gusoza umwaka w’imikino wa 2021/22 iri ku mwanya wa gatandatu, kuri ubu Musanze FC iri gutekereza uburyo yakubaka ikipe izitwara neza mu mwaka w’imikino utaha.

Mu bakinnyi iyi kipe yamaze gutangaza ko izatandukana na bo harimo Niyonsenga Ibrahim ‘Kibonge’ ukina ku mpande asatira izamu.

Uyu mukinnyi wari usoje amasezerano y’imyaka ibiri, yatsindiye Musanze FC igitego kimwe kuva avuye muri Etincelles.

Undi watandukanye na Musanze FC kuri uyu wa Gatanu, ni Uyisenga Maurice ‘Jay’ wakinaga hagati yugarira, na we akaba yari amaze imyaka ibiri muri iyi kipe yo mu Majyaruguru nyuma yo kuva muri Espoir FC.

Bombi biyongereye kuri myugariro Ndagijimana Ewing wasabye ubuyobozi bwa Musanze FC ko yakwemererwa kujya ahandi azabona umwanya uhagije wo gukina.

Ndagijimana wari usigaje umwaka umwe ku masezerano y’imyaka itatu, yatsinze ibitego bitatu mu mikino 14 yakiniyemo Musanze FC. Amakuru avuga ko mu makipe amwifuza harimo Rutsiro FC.

Niyonsenga Ibrahim ’Kibonge’

Ndagijimana Ewing

Uyisenga Maurice ’Jay’

IZINDI NKURU
Ibitekerezo(0)
Tanga Igitekerezo