Ikipe ya Kiyovu SC yanyagiye Heroes FC 4-0 mu mukino wa gishuti wabaye kuri iki Cyumweru tariki 25 Kanama 2019 kuri Stade Mumena.
Ni umukino Heroes FC iheruka kuzamuka mu cyiciro cya mbere yageragejemo abakinnyi bashya 9 igomba kwifashisha mu cyiciro cya mbere. Mubo iri kugerageza harimo Murwanashyaka Gilbert bita Rukaku wahoze akinira Kirehe FC yamaze kumanuka mu cyiciro cya kabiri.
Kiyovu SC nayo iri kureba uko abakinnyi bayo bashya yaguze bahagaze harimo nka Faisam Luhachimba ukomoka muri Uganda winjiye mu kibuga asimbuye ndetse atsinda kimwe mu bitego 4 iyi kipe yatsinze.
Kuko umutoza mukuru wa Kiyovu SC, Mugunga Dieudonne uzwi ku izina rya Buruchaga adahari kuko yagiye mu karuhuko k’igihe gito , Ruremesha Emmanuel wungirije niwe watoje uyu mukino.
Ku munota wa 2 gusa nibwo Nyirinkindi Saleh yateye ishoti riremereye, umunyezamu Iradukunda Ally uri mu igeragezwa muri Heroes FC awukuyemo usa numunanira awuhindukirana mu izamu, umusifuzi yemeza ko cyagezemo.
Heroes FC wabonaga itaramenyerana kubera ubwinshi bw’abakinnyi bashya yaje gucibwa intege n’igitego cya kabiri cyatsinzwe na Barack wa Kiyovu SC ku munota wa 47. Faisam Luhachimba ukomoka muri Uganda yatsinze igitego cya 3 yinjiye asimbuye, Lazar atsinda igitego cya 4.
Mu kiganiro yagiranye na Rwandamagazine.com , umutoza Museveni usanzwe atoza ’academy’ ya Heroes FC yavuze ko bakomeza kugerageza abakinnyi bakareba abo bazasigarana baziyongera ku bakinnyi bazamuye ikipe mu cyiciro cya mbere.
Ati " Ubu turi kwibanda cyane ku kugerageza abakinnyi ngo turebe abo tuzafatanya mu cyiciro cya mbere , ahanini twibanda ku mikino ya gishuti kuko dufite n’undi mukino wa gishuti tugomba kuzakina na AS Muhanga."
Tariki 24 Nyakanga 2019 nibwo Gasogi United na Heroes FC zatsindiye kuzamuka mu cyiciro cya mbere. Zizasimbura mu cyiciro cya mbere Amagaju FC na Kirehe FC zamaze kumamuka mu cyiciro cya kabiri.
Abanyezamu ba Heroes FC
Umutoza w’abanyezamu ba Heroes FC
Murwanashyaka Gilbert bita Rukaku wahoze akinira Kirehe FC ari kugeragezwa muri Heroes FC
11 Heroes FC yabanje mu kibuga : Iradukunda Ally (GK, C), Imanishimwe Patrick (16), Mujyanama Fidel (3), Munyentwari (15), Kabanda Felix (12), Wizeye Jafari (13), Tiendrebeogo Bassizou (14), Nyandwi Charles (4), Henry Boateng (7) , Murwanashyaka Gilbert (9) na Kwizera Tresor (8)
11 Kiyovu SC yabanje mu kibuga
Museveni (i buryo) na Barrack Hussein wahoze atoza Etincelles FC uri gufasha Heroes FC mu gihe hataraza umutoza mukuru uzaturuka muri Sweden
Kuko Buruchaga (umutoza mukuru wa Kiyovu SC) adahari, Ruremesha Emmanuel niwe watoje uyu mukino
Iragire Ramadhan waciye muri APR FC bikanga, ubu ari muri Kiyovu SC
Saleh Nyirinkindi watsinze igitego cya mbere cya Kiyovu SC ku munota wa 2 gusa w’umukino
Imanishimwe Patrick ukina ku ruhande rw’i buryo rwugarira ni umukinnyi ukiri muto ubona ufite ejo heza
Rutahizamu Moise Nyarugabo yitegerezaga abakinnyi bashya bari kugeragezwa muri Heroes FC
Faisam yinjiye mu kibuga asimbuye akanatsinda igitego
Ibitego bine nibyo byinjiye mu izamu rya Heroes FC
PHOTO: RENZAHO Christophe
