Cristiano Ronaldo yahawe akayabo nyuma yo gutsinda ibitego bitatu Norwich City

Rutahizamu wa Manchester United, Cristiano Ronaldo, yahawe agahimbazamusyi kangana n’ibihumbi 850£ (asaga miliyari 1,1 Frw) nyuma yo gutsinda ibitego bitatu mu mukino wa Premier League iyi kipe yatsinzemo Norwich City 3-2 ku wa Gatandatu.

Ni ku nshuro ya 60 Cristiano Ronaldo yari atsinze ibitego bitatu mu mukino kuva atangiye urugendo rwo gukina umupira w’amaguru nk’uwabigize umwuga.

Ibi bitego byahesheje amanota atatu Manchester United, byatumye agira 21 amaze kwinjiza muri uyu mwaka w’imikino, bimuhesha agahimbazamusyi k’ibihumbi 850£ (1,128,970,835.55 Frw).

Mu masezerano impande zombi zasinyanye ubwo Ronaldo yagarukaga i Manchester mu mpeshyi ya 2021 harimo ko nageza ibitego 20 mu mwaka w’imikino azahabwa ibihumbi 750£.

Ibindi bihumbi 100£ yaraye ahawe ni iby’igitego cya gatatu yatsinze. Mu masezerano harimo ko nyuma yo kugeza ibitego 20, ikindi gitego azajya atsinda, kizajya kimuhesha ibihumbi 100£ kugeza umwaka w’imikino urangiye.

Ronaldo w’imyaka 37, naramuka abashije kugeza ku bitego 30 muri uyu mwaka w’imikino, azinjiza miliyoni 2,7£.

Ibitego bye bikaba byafashije Manchester United kugira amanota 54 ku mwanya wa gatanu, iyanganya na Arsenal yatsinzwe na Southampton igitego 1-0 mu gihe na Tottenham ya kane n’amanota 57, yatsinzwe na Brighton igitego 1-0 ku wa Gatandatu.

Cristiano Ronaldo yishimira kimwe mu bitego bitatu yatsinze Norwich City ku wa Gatandatu

Ronaldo azajya ahabwa ibihumbi 100£ kuri buri kindi gitego azatsinda muri uyu mwaka w’imikino

IZINDI NKURU
Ibitekerezo(0)
Tanga Igitekerezo