Bigoranye, Real Madrid yasanze Liverpool ku mukino wa nyuma wa Champions League (Amafoto)

Real Madrid yasezereye Manchester City muri UEFA Champions league y’uyu mwaka nyuma yo gutsinda Manchester City ibitego 3-1 mu mukino wo kwishyura wabereye i Santiago Bernabeu ku wa Gatatu bigasaba ko hakinwa iminota 120.

Uyu mukino wa 1/2 wo kwishyura warangiye Real Madrid iri mu byishimo byo gutsinda Manchester City ibitego 3-1 ihiga ikatisha itike y’umukino wa nyuma izahuramo na Liverpool tarkki ya 28 Gicurasi 2022.

Nubwo yari mu rugo, Real Madrid yatangiye nabi umukino kuko yabanjwe igitego cyayishegeshe ku munota wa 74 gitsinzwe na Riyad Mahrez.

Real Madrid yari iifite umwenda w’ibitego bibiri byayisabye gukoresha imbaraga nyinshi kugira ngo igire icyizere cyo kuguma mu irushanwa.

Ku munota wa 90, Rodrygo yatsindiye Real Madrid igitego kimwe kiyigarurira icyizere abafana n’abakunzi b’iyi kipe.

Umusifuzi yongeyeho iminota itandatu, ariko hashize umwe gusa, Rodrygo yatsindiye Real Madrid igitego cya kabiri bituma amakipe yombi anganya ibitego 5-5 mu mikino yombi.

Iminota 90 y’umukino yarangiye hongerwaho indi 30 kugira ngo haboneke ukomeza ku mukino wa nyuma.

Ku munota wa 96, Karim Benzema yatsinze igitego cy’agashinguracumu cyahaye intsinzi Real Madrid kuri penaliti yateye neza akayinjiza.

Manchester City yakoze iyo bwabaga kugira ngo yishyure igitego ariko biranga uburyo bagerageje ntibubahire.

Iminota 120 yarangiye Real Madrid yegukanye intsinzi ku bitego 3-1 mu mukino wo kwishyura, biba ibitego 6-5 mu mikino yombi, Pep Guardiola n’abasore be barasezererwa.

Real Madrid yasanze Liverpool ku mukino wa nyuma w’igikombe cy’uyu mwaka, uzabera kuri Stade de France, i Paris, tariki ya 28 Gicurasi 2022 saa Tatu z’ijoro.

Amateka agiye kwisubiramo kuko mu 2018 Real Madrid yahuye na Liverpool ku mukino wa nyuma warangiye Liverpool itsinzwe ibitego 3-1 mu minota 90 bituma itakaza igikombe.