Ikipe y’u Rwanda y’abagabo y’umukino wa Basketball yamanutseho imyanya 5 ku rutonde rw’Ishyirahamwe Mpuzamahanga ry’umukino wa Basketball ku Isi “FIBA”, igera ku mwanya wa 92 ku Isi n’umwanya wa 13 muri Afurika.
Urutonde rwashyizwe ahagaragara na Sosiyete ya NIKE, tariki 16 Nzeri 2019, ni nyuma y’uko hasojwe imikino ya nyuma y’igikombe k’Isi “Men’s Ranking after the FIBA Basketball World Cup 2019”, yaberaga mu Bushinwa kuva tariki 31 Kanama kugeza 15 Nzeri 2019.
Mu mikino ikipe y’u Rwanda nkuru mu kiciro cy’abagabo iheruka gukina y’Akarere ka 5 muri Basketball “FIBA Africa Zone 5”, yabereye i Kampala muri Uganda, kuva tariki 26 Kamena kugeza 01 Nyakanga 2019, yasoreje ku mwanya wa 4 mu makipe 5 yari yitabiriye.
Muri iyo mikino y’Akarere ka 5 mu kiciro cy’abagabo; Kenya niyo yabaye iya mbere n’amanota 7, ikaba yarayanganyaga na Misiri yabaye iya kabiri, Uganda iba iya 3 n’amanota 6 iyanganya n’u Rwanda (4) naho Tanzania iba iya nyuma (5) n’amanota 4.
Nyuma y’iyi mikino y’Akarere ka 5, ikipe y’u Rwanda mu bagabo ntabwo yabashije kubona itike y’imikino y’Afurika “FIBA AfroCan 2019”, yabereye i Bamako muri Mali muri Nyakanga 2019.
Kuri uru rutonde, Nigeria ni yo iyoboye muri Afurika n’umwanya wa 23 ku Isi aho yazamutseho imyanya 10, ikurikiwe na Angola iri ku mwanya 32, Tunisia ni ya 3 n’umwanya wa 33 ku Isi, Senegal ikaba iya 4, umwanya 35 ku Isi, Cote d’Ivoire ni ya 5 n’umwanya 48 ku Isi.
Belize ni cyo gihugu cyazamutse imyanya myinshi (50), kuko cyavuye ku mwanya 168 kigera ku mwanya wa 118 naho Jamaica ni yo yamanutse imyanya myinshi (15) kuko yavuye ku mwanya wa 72 igera ku mwanya 87.
Muri rusange mu rwego rw’Isi nta mpinduka zabayeho mu myanya 2 ya mbere, kuko USA ni yo iyoboye urutonde igakurikirwa na Espagne ifite igikombe k’Isi cya 2019, Australia ni ya 3 (yazamutsho imyanya 8), Argentine yakinnye umukino wa nyuma w’igikombe k’Isi yazamutseho umwanya umwe igera ku mwanya wa 4 naho ikipe y’u Bufaransa yabaye iya 3 mu gikombe k’Isi n’iya 5 aho yamanutseho imyanya ibiri.
