Argentine ya Messi yegukanye Igikombe cya Finalissima inyagiye u Butaliyani

Lionel Messi na Angel di Maria bigaragaje ubwo Argentine yatsindaga u Butaliyani ibitego 3-0, ikegukana Igikombe cya Finalissima gihuza ikipe yatwaye EURO n’iyegukanye igikombe gihuza ibihugu byo muri Amerika y’Epfo.

Lautaro Martinez yafunguye amazamu ku munota wa 28, ku mupira mwiza yahawe na Lionel Messi mu gihe Angel di Maria yatsinze igitego cya kabiri mbere y’uko amakipe yombi ajya kuruhuka.

Paulo Dybala wagiye mu kibuga asimbura ni we watsinze igitego cya gatatu mu minota y’inyongera y’igice cya kabiri, uyu mukino wabereye kuri Stade Wembley ku wa Gatatu urangira ari ibitego 3-0.

Intsinzi ya Argentine imbere y’abafana 87,112 yatumye igeza imikino 32 idatsindwa kuva muri Kamena 2019.

Finalissima ya 2022 ubundi bisobanura “Grand Final” ni irushanwa ryongeye gushyirwaho ku makipe yatwaye ibikombe bihuza ibihugu hagati ya Copa América yo muri Amerika y’Epfo na Euro mu Burayi.

Mbere y’uyu mukino wabaye ku wa Gatatu, hari hamaze gukinwa indi ibiri gusa, yabaye mu 1985 no mu 1993.

Mu 1989 byari biteganyijwe ko haba uyu mukino, ariko u Buholandi na Uruguay binanirwa kumvikana ku itariki.

U Bufaransa bwegukana iri rushanwa mu 1985 butsinze Uruguay ibitego 2-0 naho Argentine iryegukana mu 1993 itsinze Denmark kuri penaliti 5-4.

Nyuma y’umukino wo mu 1993, ntabwo uyu mukino wongeye kuba kugeza ubwo hongeraga kuba ubwumvikane mu 2020.