Ikipe ya APR VC y’abagore yabonye itike ya ½ kirangiza mu irushanwa rya “Mwalimu Nyerere Memorial Volleyball Cup 2019”, ni nyuma y’uko yitwaye neza igasoza imikino yo mu itsinda rya kabiri “B” yari iherereyemo, iri ku mwanya wa mbere.
Iyi kipe ihagarariye igihugu muri iri rushanwa ririmo kubera mu mujyi wa Arusha muri Tanzania, yitwaye neza itsinda Orkeeswa yo muri Tanzania mu mukino wa nyuma w’itsinda “B”, amaseti 3-0 (25-07, 25-08 na 25-06). Ni umukino wabaye kuri uyu wa Gatandatu tariki 12 Ukwakira 2019.
APR VC kandi yari yatangiye itsinda imikino ibiri ibanza, irimo uwa Jeshi Stars amaseti 3-0 (25-11, 25-15 na 25-9) ndetse n’uwa Hakika amaseti 3 kuri 1(25-18, 20-25, 25-21 na 25-23), wabaye tariki 11 Ukwakira 2019.
Ikipe ya APR VC ifite igikombe k’iri rushanwa ryabaye mu 2017, yasoje itsinda rya kabiri “B”, iri ku mwanya wa mbere n’amanota 9 mu mikino 3 yakinnye.
Biteganyijwe ko umukino wa nyuma ndetse n’uwo guhatanira umwanya wa 3 uzakinawa ku wa Mbere tariki 14 Ukwakira 2019.
Irushanwa rya “Mwalimu Nyerere Memorial Volleyball Cup 2019”, ryateguwe ku nshuro ya 19, mu rwego rwo kwibuka Julius Nyerere wahoze ari Perezida wa Tanzania, ririmo kubera mu mujyi wa Arusha kuva tariki 10-14 Ukwakira 2019.
APR VC y’abagore yamaze gukatisha itike ya 1/2 k’irushanwa rya Nyerere Cup 2019
Ikipe ya APR VC yitwaye neza itsinda Orkeeswa mu mukino wa nyuma w’itsinda “B”, amaseti 3-0 (25-07, 25-08 na 25-06)
APR VC ikaba yarangije imikino y’itsinda B iri ku mwanya wa mbere n’amanota 9
Abakinnyi b’ikipe ya Orkeeswa yo muri Tanzania ubwo bakinaga umukino wa nyuma w’itsinda “B”
