Inama yahuje abanyamuryango ba FERWAFA kuri uyu wa Gatanu, tariki ya 30 Gicurasi 2021, hifashishijwe ikoranabuhanga, yemeje ko amakipe yose yemerewe gukoresha abanyamahanga batanu mu bakinnyi 18 bemewe ku rupapuro rw’umukino.
Ubusanzwe, kuva mu 2013, mu marushanwa y’imbere mu Gihugu, buri kipe yo mu Cyiciro cya Mbere yabaga yemerewe abakinnyi batatu b’abanyamahanga muri 18 bitabazwa ku mukino.
Ni itegeko amakipe menshi yifuje ko ryahinduka kuva mu 2015, ariko ntahurize kuri ubwo busabe. Mu Nteko Rusange ya FERWAFA yabaye ku wa 17 Ukuboza 2020, iyi ngingo ntiyagarutsweho, aho byavuzwe ko Rayon Sports yabisabye igihe cyararenze.
Inama yahuje abanyamuryango b’iri Shyirahamwe ry’Umupira w’Amaguru kuri uyu wa Gatanu, yanzuye ko buri kipe yemererwa abakinnyi batanu b’abanyamahanga muri 18 bitabazwa ku mukino, ariko na bo bakaba batarengeje imyaka 30.
Kuri ubu, isoko ry’igura ry’abakinnyi ryatangiye ku wa 27 Nyakanga, rizafunga ku wa 15 Ukwakira 2021.
APR FC yatwaye Shampiyona ya 2020/21 ndetse na Police FC yasoje ku mwanya wa kane, ni zo zidakinisha abanyamahanga kuva mu 2013.
Gusa, ubuyobozi bw’Ikipe y’Ingabo buherutse guca amarenga ko bushobora gusubira ku cyo bwanze, bugasubira kuri politiki yo gukinisha abanyamahanga.
Ku bijyanye na Shampiyona y’Icyiciro cya Kabiri itarakinwa kugeza ubu, nta mwanzuro wafashwe, ariko harateganywa ko iy’uyu mwaka itaba, ikaba yatangirira rimwe n’iy’Icyiciro cya Mbere ku wa 16 Ukwakira, zombi zigasozwa ku wa 18 Kamena 2022. Amatariki yatanzwe ashobora guhinduka kuko ni icyemezo kizafatwa nyuma yo kugisha inama inzego zitandukanye.
