Nyuma y’uko hamaze iminsi havugwa ikibazo cy’umukinnyi Nishimwe Blaise wa Rayon Sports bivugwa ko ashobora kuva muri iyi kipe akerekeza muri APR FC, abafana ba Rayon Sports biyemeje kwegeranya amafaranga y’umwenda iyi kipe imusigayemo ngo ayigumemo.
Tariki 15 Nyakanga 2021 nibwo Nishimwe Blaise yandikiye Rayon Sports ibaruwa ayisaba ko bakorana amasezerano mashya kuko aya mbere atubahirijwe (nkuko bikubiye mu ngingo ya 6 yayo) , ntahererwe igihe amafaranga ya recruitment (mu mezi atatu ) yagombaga gukurikiraho uhereye igihe yasinyiye muri Rayon Sports (Nzeli 2020).
Ikipe ya Rayon Sports yamwandikiye ibaruwa imusubiza tariki 29 Nyakanga 2021 bamumenyesha ko impamvu ataherewe igihe amafaranga ye byatewe n’impamvu zinyuranye harimo ibihe isi irimo bya covid-19 ngo byatumye impannde zombi zitabasha kubahiriza byinshi mu byumvikanyweho mu masezerano.
Muri iyo baruwa bandikiye Blaise, ubuyobozi bwa Rayon Sports ngo ntibwasobanukiwe niba Blaise yarasabaga gusesa amasezerano asanzwe ari naho bahereye bagira bati " biramutse ari uko biteye , turasanga ku bwa Rayon Sports ari nta mpamvu ifatika yo gusesa amasezerano agifite hafi imyaka isaga ibiri, ariko mu gihe byaba bikozwe ku bushake bw’uruhande rumwe gusa, hakaba hakubahirizwa ingingo ziteganywa mu masezerano zijyanye n’iseswa ry’amasezerano hagati y’impande zombi."
Abafana biyemeje gutanga amafaranga asigaye ku yaguzwe Blaise
Nyuma y’uko Blaise asabye ko yakorana amasezerano mashya na Rayon Sports, byavuzwe ko yaba ashakwa cyane n’ikipe ya APR FC akaba yayerekezamo kubera ko amasezerano ye muri Rayon Sports atubahirjwe uko bikwiriye bityo akaba yayasesa.
Abafana ba Rayon Sports bibumbiye muri Fan Base ya Rayon Sports batangiye igikorwa cyo gukusanya asaga miliyoni n’ibuhumbi magana ane ikipe yari imusigayemo bityo ngo ikibazo cye kirangire bitarenze ku wa mbere tariki 2 Kanama 2021.
Fista Jean Damascene, Visi Perezida wa Gikundiro Forever ari na we wazanye iki giterekerezo muri Fan Base ya Rayon Sports yatangarije Rwandamagazine.com ko nyuma y’aho ikibazo cya Blaise kimenyekaniye, ngo biyemeje ko nk’umuryango mugari wa Rayon Sports bagira uruhare mu kigikemura.
Ati " Twamenye ko hari ideni rya 1.420.000 Frw dufitiye Blaise , twiyemeza ko ayo mafaranga yashakishwa hagati yacu kugira ngo kive mu nzira , yicare atuze azabashe kudukinira umwaka utaha."
Yunzemo ati " Nakigejeje kuri bagenzi banjye duhuriye muri fan base bacyakira neza, ubu dutangiye kuyegeranya, akazashyikirizwa ubuyobozi nabwo bukayamushyikiriza, ikibazo kikarangira."
Fista akomeza avuga ko hari abanyamuryango benshi Rayon Sports ifite bari kubasha gutanga ariya mafaranga ku giti cyabo ariko ngo bifuje ko buri munyamuryango wese ikibazo akigira icye.
Ati "Muri Rayon Sports hari abantu benshi bashobora guhita batanga ariya mafaranga ariko twifuje ko buri mufana wese abigira ibye ku buryo hari n’abantu ku giti cyabo biyemeje kugira icyo bakora kuri iki kibazo."
Murego Philemon uyobora Ijwi ry’aba Rayon we yagize ati " Twiyemeje kugira icyo dukora ngo Blaise agume mu ikipe yacu. Ni umwe mu bakinnyi burya bagira ubwitange bukomeye, ikigeretse kuri icyo kandi akaba ari umwana ugira ikinyabupfura ku buryo iki atari igihe cyo kumutakaza kuko yazagira byinshi ageza ku ikipe binarenze kure ibyo yaduhaye uyu mwaka wa mbere adukiniye."
Yunzemo ati " Hari igihe mu ikipe havuka ikibazo ugasanga abantu bahugiye mu kukivugaho gusa ariko twe twanze kwicara ngo duherere mu kuvuga ko dukeneye ko Blaise aguma mu ikipe yacu, ahubwo tukagira uruhare tubigiramo."
Mugisha Theogene wiyemeje gutanga ku giti cye, yabwiye Rwandamagazine.com ko yiyemeje kwifatanya n’abandi kuko n’ubundi ngo Rayon Sports ari ikipe y’abafana, ari nabo bagomba kuyiyubakira no gukemura ibibazo byayo.
Ati " Rayon Sports niyo soko y’ibyishimo byacu ari nayo mpamvu duhora duharanira ko ikibazo cyose cyavuka twagira uruhare rwo kucyicyemurira. Nanjye niyemeje kugira uruhare mu kwifatanya n’abandi. Niko byahoze ko mu muryango wacu wa Rayon Sports , ikibazo kibayeho cyose tucyicyemurira. Icya Blaise nticyatunanira dushyize hamwe."
Fan Clubs zahise zitangira iki gikorwa harimo Gisaka Fan club , The blue family, Ijwi ry’aba Rayon, Isaro Fan Club ,New Vision Fan Club , Friends Fan Club, Ruhango FAN CLUB, Ibyishimo by’aba Rayon , Winning Team Fan Club , Gikundiro Forever na Dream Unity.
Nishimwe Blaise yasinye muri Rayon Sports muri 2020, ayisinyira kuyikinira imyaka itatu. Yari avuye muri Marines FC.
Fista Jean Damascene, Visi Perezida wa Gikundiro Forever wazanye igitekerezo cy’uko abafaba bagira uruhare mu ikemuka ry’ikibazo cya Blaise
Murego Philemon ukuriye Ijwi ry’Aba Rayon avuga ko bagomba gukora ibishoboka byose ngo Blaise agume mu ikipe yabo
Mugisha Theogene na we ari mu biyemeje kugira uruhare mu ikemuka ry’ikibazo cya Blaise
