Umugabo w’imyaka 37 y’amavuko abaye umuntu wa munani wishwe n’icyorezo cya COVID-19 mu Rwanda, nk’uko Minisiteri y’Ubuzima yabitangaje ku mugoroba wo kuri uyu wa Gatatu tariki 12 Kanama 2020. Niwe ukiri muto mubo imaze guhitana mu Rwanda.
Ni uwa kabiri ukiri muto mu bagabo batanu b’imyaka 37,51,78, 51 na 65 n’abagore batatu b’imyaka 77,88 na 24 imaze kwica bose hamwe mu Rwanda.
Minisiteri y’Ubuzima yanditse ubutumwa kuri Twitter yihanganisha umuryango w’uwo mugabo witabye Imana ari i Kigali.
Iyi Minisiteri kandi yatangaje ko kuri uyu wa Gatatu abantu 46 bakize, mu gihe habonetse abarwayi bashya 18.
Abo barwayi bashya barimo 15 babonetse i Kigali bakaba ngo barahuye n’abanduye ndetse n’abapimwe mu bibasiwe kurusha abandi.
Mu Karere ka Ngoma habonetse babiri, naho i Rubavu haboneka umwe.
Mu Rwanda hamaze gufatwa ibipimo by’abagera kuri 314.539. Abo basanzemo iyi ndwara bose hamwe bakaba kugeza ubu ari 2.189.
Minisiteri y’Ubuzima isaba Abaturarwanda bose gukomeza kwitwararika bubahiriza amabwiriza yo kwirinda ikwirakwira ry’icyorezo cya COVID-19.
Ku wa mbere, nyuma y’uko hapfuye abantu babiri bikurikiranya, Ministiri w’ubuzima Dr Daniel Ngamije, yaburiye Abanyarwanda ko iki cyorezo kigihari "abantu badakwiye kwirara ku ngamba zafashwe zo kwirinda".
Minisiteri y’ubuzima ivuga ko mu bamaze kwicwa n’iyi ndwara umwe yapfiriye i Nyamasheke, abandi i Kigali.
