Abajenerali batatu bo mu kanama ka gisirikare kayoboye Sudani beguye

Batatu mu bayobozi bakuru b’akanama ka gisirikare kayoboye Sudani by’inzibacyuho batavugwaho rumwe batangaje ukwegura kwabo, iki kikaba ari kimwe mu byifuzo bikomeye by’abigaragambya.

Aba bajenerali ni Omar Zain al-Abideen, Jalal al-Deen-Sheikh na Al-Tayeb Bakar Ali Fadee, basanzwe bazwiho kuba inkoramutima za Omar al-Bashir uheruka guhirikwa ku butegetsi. Babonwa kandi nk’abahezanguni ku myemerere ya Islam.

Abayoboye imyigaragambyo baherutse gutangaza ko batazongera kuganira n’iyi nama ya gisirikare. Gusa ejo ku wa gatatu nimugoroba ibiganiro bibahuza byarasubukuwe.

Hashize amasaha macye ibi biganiro bitangiye nibwo abo bajenerali batatu bahise begura.

Kubavana muri ako kanama ka gisirikare byari kimwe mu byifuzwa cyane n’abigaragambya.

Kwegura kwabo biri kubonwa nk’intsinzi nto ku bigaragambya basaba ko ubutegetsi bushyirwa mu maboko y’abasivile.

Mu kiganiro n’abanyamakuru, umuvugizi wa gisirikare Liyetona Jenerali Shamseddine Kabbashi yavuze ko impande zombi zumvikanye kuri byinshi mu byo abigaragambya basaba.

Yavuze kandi ko bemeranyije gushinga akanama gahuriwemwo n’impande zombi kugira ngo ibyo batumvikanaho babishakire umuti.

BBC dukesha iyi nkuru itangaza ko kuri uyu wa kane, biteganyijwe ko abigaragambya bakora indi myigaragambyo mu murwa mukuru Khartoum wa Sudani, mu gukomeza gusaba amavugurura agamije demokarasi.

Abayoboye abigaragambya bavuga ko bashaka ko akanama ka gisirikare kari ku butegetsi by’inzibacyuho gashyira ubutegetsi mu maboko y’abategetsi b’abasivile.

IZINDI NKURU
Ibitekerezo(1)
  • Fofo

    Abanyagihugu nibobafite ijambo

    - 25/04/2019 - 14:34
Tanga Igitekerezo